Jarayon – voqea va hodisalar rivojidagi uzluksizlikni, tabiat, jamiyat va insoniyat hayotidagi muttasil va doimiy harakatni ifodalovchi tushuncha. Jarayon ijtimoiy, iqtisodiy, siyosiy, madaniy, ma’naviy, ilmiy va boshqa sohalarda namoyon bo‘lishi mumkin. Miqyosiga ko‘ra umumbashariy, mintaqaviy va milliy ahamiyatga molik jarayonlar bir-biridan farqlanadi. Ijtimoiy jarayonlar, odatda, ularni belgilovchi omillar va manbalarga nisbatan sabab va oqibat sifatida namoyon bo‘ladi. Demak, har qanday jarayon, shu jumladan, ijtimoiy jarayonlar zohiriy va botiniy asoslarga ega bo‘lib, ular ayni chog‘da sabab va oqibat, zaruriyat va tasodifiyat tushunchalarida o‘z ifodasini topadigan munosabatlarni anglatadi. Ijtimoiy taraqqiyotning tarkibiy qismi bo‘lgan jarayonlar jamiyat kayfiyatiga ta’siri nuqtai nazaridan salbiy va ijobiy tarzda namoyon bo‘lishi mumkin. Jarayon inson omilining kuchi va qudratiga bog‘liq. Ularni boshqarish, maqsad sari yo‘naltirish muhim ahamiyatga egadir.