“Jamiyatimizning yangi qiyofasi” – Prezident Sh.Mirziyoyev tomonidan asoslab berilgan va xalqimiz taraqqiyotining hozirgi bosqichiga mos ravishda yuzaga kelayotgan, keng qamrovli islohotlar va tub o‘zgarishlar jarayonida shakllanayotgan Yangi O‘zbekistonning zamonaviy qiyofasini aks ettirayotgan tushuncha. Ushbu tushuncha qotib qolgan voqelik yoki o‘zgarmas aksiomani anglatmaydi, balki xalqimiz hayotining hamma sohalari va jamiyatimizning barcha jabhalarida ro‘y berayotgan o‘zgarishlar va yangilanishlarning muqarrar natijalarini aks ettiradi. Shu bilan birga ushbu tushuncha mamlakatimizda amalga oshirilayotgan islohotlarning bosh maqsadi inson, uning hayoti, qadr-qimmati, ehtiyojlari va manfaatlariga qaratilganligi hamda fuqarolar huquqlari va erkinliklari tom ma’noda qadriyatga aylanayotgani va o‘zgarishlar hamda yangilanishlarning asl maqsad va muddaolarni ham ifodalaydi. Ayni paytda mamlakatimizning bar qaror rivojini ta’minlash bilan bog‘liq zamonaviy paradigmalarga asoslanadigan yangi jamiyatni barpo etish g‘oyasi xalqimizning barcha qatlamlari tomonidan qo‘llab-quvvatlanayotgani va uning bu g‘oya atrofida jipslashayotgani ham jamiyatimizning yangi qiyofasini barpo etish jarayonining mazmun-mohiyatini aks ettiradi.

Jamiyatimizning yangi qiyofasi tushunchasida O‘zbekistonni erkin va baxtli odamlar yashaydigan qudratli va salohiyatli davlatga aylan tirish, bu borada mamlakatimizni dunyoning 50 ta rivojlangan, iqtisodiyoti bar qaror o‘sayotgan, inson kapitali yuqori bo‘lgan raqobatbardosh demokratik davlatlari qatoriga kirishini ta’minlashga harakat qilinayotgani yaqqol namoyon bo‘lmoqda. Ushbu tushunchaning mazmun-mohiyatida bugungi dunyoning ko‘plab mamlakatlari “to‘rtinchi sanoat inqilobi” arafasida turgan bir paytda, mamlakatning innovasion rivojlanish yo‘li dan jadal harakatlanishi, “raqamli iqtisodiyot”, “erkin axborot jamiyati” hamda inson parvar “axborot maydoni”ni shakllantirishga harakat qilinayotgani ham o‘z ifodasini topgan.

Bugungi kunga kelib, ushbu fenomenal tushuncha jamiyatimiz hayoti, xalqimiz qalbi va ongidan chuqur joy olib, islohotlar jarayoniga katta ta’sir ko‘rsatmoqda. Natijada bu jarayonda xalqimizning hayotiy talab va ehtiyojlarini ta’minlash, odamlarimizni rozi qilish yo‘lidagi zalvorli ishlar o‘z mohiyati va ahamiyatini yaqqol namoyon qilmoqda. Jamiyatimizning yangi qiyofasi tushunchasi uchun asos bo‘layotgan va unda o‘z aksini topayotgan eng muhim jihatlar va amaliy hayot mezonlari avvalo, butun mamlakatimizda islohotlar va yangilanishlarning keng ko‘lamda amalga oshirilayotganligi, eng muhimi, raqobatbardosh va tashqi olam uchun ochiq ijtimoiy-iqtisodiy makonni barpo etishga sobitqadamlik bilan kirishilgani kabi tamoyillarga tayanadi.

Jamiyatimizning yangi qiyofasi tushunchasining takomili mamlakatimizni rivojlantirish bo‘yicha Yangi O‘zbekiston strategiyasi to‘liq amalga oshirish mas’uliyatining butun xalqimiz tomonidan chuqur his etilayotgani va ushbu maqsad yo‘lida aholining barcha qatlamlari, hokimiyatning vakillik va ijro organlari, fuqarolik institutlarining imkoniyatlari ishga solinayotgani; jamiyat qurilishi va davlat boshqaruvi yangilanib, “Xalq davlat idoralariga emas, balki davlat organlari xalqqa xizmat qilishi lozim” degan umuminsoniy tamoyilga amal qilinayotgani bilan uzviy bog‘liqdir. Bu jihatdan, ushbu jarayon “Xalq boy bo‘lsa, davlat ham boy va qudratli bo‘ladi” tamoyili asosida barchaning mulk huquqini hurmat qilish, shaxs, jamiyat va davlat manfaatlari uyg‘unligi tamoyili joriy etilgan kuchli fuqarolik jamiyati, konstitutsiyaviy parlament demokratiyasi, erkin bozor iqtisodiyotining mamlakatimiz va xalqimiz ravnaqining asosiga aylanayotganini ham ifodalaydi.

Bularning barchasi jamiyatimizning yangi qiyofasini yaratish, uchinchi Renessans poydevorini barpo etish yo‘lidagi islohotlarning qat’iyat va sobitqadamlik bilan amalga oshirilayotganini anglatadi. Zero, jamiyatimizning yangi qiyofasi ana shunday serqirra islohotlar jarayonida barpo bo‘lmoqda, uning zamonaviy qiyofasi bosqichma-bosqich shakllanib bormoqda. Lekin bu osongina amalga oshmasligi, yangi jamiyat binosi bir kunda tiklanib qolmasligi aniq. Inson manfaatlari ustuvor bo‘ladigan erkin va farovon hayot jo‘ngina shakllanmasligi shubhasiz va bu jamiyatimizning yangi qiyofasini yaratish borasida barchamizning zimmamizda ulkan mas’uliyat mavjudligidan dalolat beradi.