Yolg‘on – jamiyatda, kishilar o‘rtasidagi o‘zaro munosabatlarda namoyon bo‘ladigan salbiy illat. Yolg‘on so‘z azaldan barcha xalqlar tomonidan tuhmat, bo‘hton, chaqimchilik, manmanlik, qo‘rslik, qo‘rqoqlik, beparvolik singari o‘ta jirkanch illatlar sifatda qoralanib kelingan. Yolg‘on so‘z, yolg‘on xabar jamiyatda ham, mahallada ham, oilada ham jiddiy oqibatlarga olib kelishi, kishilar orasiga nifoq solishi, oilalarning buzilishiga, mamlakatda parokandalikning yuzaga kelishi sabab bo‘lishi mumkin. Ayniqsa, axborot-kommunikatsiya vositalari, texnika va texnologiyalar taraqqiy etgan hozirgi davrda yolg‘on xabarning qanchalik mash’um, buzg‘unchi rol o‘ynashi, xalqaro munosabatlarda alg‘ov-dalg‘ovlarni keltirib chiqarishi mumkinligini ko‘rsatmoqda. Darhaqiqat, yolg‘on so‘z, yolg‘onchilik, yolg‘on xabar o‘zining ma’no-mazmuni, mohiyati bilan kishilar o‘rtasidagi, jamiyatdagi hamjihatlikka rahna solib, mehnat jamoalari, oila va mahallada tinchlik-ahillikni buzishga yo‘naltirilgan bo‘ladi. Shu ma’noda, yolg‘on so‘z, yolg‘onchilik – adolat, haqiqat, tinchlik-osoyishtalik, jamiyatdagi bunyodkorlik va yaratuvchanlik, tashabbuskorlik va taraqqiyotga to‘sqinlik qiladigan ma’naviyatga zid illatdir.