Yetim(lik) – ota-onasiz qolgan bolalar holatini ifoda etadigan ijtimoiy tushuncha. Yetim, ya’ni o‘z oilasidan, yaqinlaridan vaqtincha yoki butunlay mahrum bo‘lgan yoxud muayyan sabablarga ko‘ra, ota onasidan ajralgan davlatning alohida himoyasida bo‘ladi. Sharqda azaldan Yetim-yesirlarga g‘amxo‘rlik qilish, ularning boshini silash, mehr-oqibat ko‘rsatish yuksak qadriyat sifatida e’zozlab kelinadi. Mustaqillik yillarida yaxshilik va ezgulik, olijanoblik va mehr-oqibat, bag‘rikenglik va saxovat kabi muqaddas tushunchalar qaror topib borayotgan davlatimizning, ko‘plab vatandoshlarimizning xayrli, savobli ishlarida, xususan, yetim bolalarni moddiy va ma’naviy jihatdan qo‘llab-quvvatlash, xatna to‘ylarini o‘tkazish, o‘qish va oila qurishiga ko‘maklashish, jamiyatda o‘z o‘rnini topishga yordam berish kabi amallarda namoyon bo‘lmoqda. Bu hol jamiyatimizning insonparvarlashuvi, mamlakatda inson haq-huquq va manfaatlari oliy qadriyat ekanidan dalolatdir.