Diniy ekstremizm – ekstremizmning diniy sohada namoyon bo‘lish shakli. Diniy ekstremizm muammolarni hal etishda o‘ta keskin chora-tadbirlarni, fikr-qarashlarni yoqlovchi nazariya va amaliyotni anglatadi. U namoyon bo‘lish ko‘lamiga ko‘ra, hududiy, mintaqaviy, xalqaro shakllarga bo‘linadi. Bunday qarashlar juda qadimiy ildizlarga ega bo‘lib, hech qachon chegara bilmagan, din, millat, hududni tan olmagan, barcha dinlar doirasida rivojlangan. Diniy ekstremizm ruhidagi qarashlarni buddizm, xristianlik, islom, katoliklar, protestantlar, pravoslavlar orasida birday uchratish mumkin. Diniy ektremistlar qayerda faoliyat ko‘rsatmasin, asosiy maqsadi diniy davlatni barpo qilish bo‘lib, bunga o‘zaro nizolar, ixtiloflar, qurolli to‘qnashuvlar orqali, ya’ni qon to‘kish va zo‘rlik bilan erishishni ko‘zlaydi. Bu esa, davlat mustaqilligiga ham, jamiyat taraqqiyotiga ham katta g‘ov bo‘ladi. Ekstremistik guruhlarning yagona maqsadi hokimiyatni qo‘lga olish bo‘lib, bu yo‘lda ular eng jirkanch usullarni qo‘llashdan ham tap tortmaydi. Bugungi kunga kelib nafaqat islom dunyosi, balki butun jahonda diniy ekstremizmning asl qiyofasi yaqqol namoyon bo‘lib bormoqda. Dunyoda inson huquqlari va demokratik tamoyillar ustuvor bo‘lib borayotgan, qonun hamda xalqaro huquq qoidalari mamlakatlar, xalqlar, davlatlar o‘rtasidagi munosabatlarning asosiy tamoyiliga aylanayotgan hozirgi davrda diniy ekstremizmga qarshi birgalikda kurashish, uni ildizi bilan qo‘porib tashlash, bu borada doimo ogoh va hushyor bo‘lib yashash bugungi kundagi eng dolzarb vazifadir.