Ozod Sharafiddinov

–       Jamiyat iqtisodiy jihatdan har qancha qudratli bo‘lmasin, ma’naviy ustunlari zaif bo‘lsa,  u uzoq yashay olmaydi.

–       XXI asrning bizga munosib asr bo‘lishini talab qilishdan avval biz o‘zimiz XXI asrga munosib bo‘lmog‘imiz kerak.

–       Yolg‘on yuqumli kasaldek tez tarqaladi – unga bir marta yo‘l ochib berilsa, keyin seldek hamma yoqni qoplab oladi.

–       Ilm-fansiz, ilg‘or texnologiyasiz, yuksak madaniy va ma’naviy saviyasiz bozor iqtisodiyotiga asoslangan jamiyatni qurib bo‘lmaydi.

–       “O‘tmish yaxshi edi” yoxud “o‘tmish yomon edi” deya chamalab o‘tirishning o‘zi behuda gap. Lekin o‘tmishda biz o‘zimiz qandoq edik, undan qanday chiqdik va yangi asrga nima bilan kiramiz, degan savol o‘rinli.

–       Odamlar biron bir ishni jinoyat kodeksidan qo‘rqqani, boshidagi qamchidan cho‘chigani vajidan emas, balki boshqacha yashashni tasavvur etolmagani – halollik, insof, diyonat ichki zaruriyatga aylangani uchun qilmog‘i lozim. Bunga erishmoq uchun esa hayotda ma’naviy qadriyatlar har qanday buyrug‘u ko‘rsatmalardan yuqori turmog‘i darkor.

–       Poklanish davri keldi. Endi biz yangi jamiyatimizni muhabbat asosiga, insof va diyonat asosiga qurmog‘imiz kerak.

“Tafakkur” jurnali, 2019-yil 2-son