Demokratik tamoyillar – huquqiy demokratik jamiyat asosini belgilaydigan demokratik qonun-qoidalar majmui. Bugungi kunda ularsiz demokratiyani tasavvur qilib bo‘lmaydi. Barcha fuqarolarning qonun oldidagi tengligi va xalqning hokimiyat manbai bo‘lib xizmat qilishi demokratik tamoyillar asosini, o‘zagini tashkil etadi. Hokimiyatni monopollashtirishga yo‘l qo‘ymaydigan tizimni tashkil etadigan davlat hokimiyatining qonun chiqaruvchi, ijro etuvchi va sud hokimiyatlariga bo‘linishi demokratiyaning yana bir muhim tamoyilidir. Qarorlarning ko‘pchilik ovoz bilan qabul qilinishi, ozchilikning ko‘pchilik irodasiga bo‘ysunishi ham demokratik tamoyillardan hisoblanadi. Fuqarolarning fundamental huquq va erkinliklarini (shaxsiy, siyosiy, iqtisodiy, ijtimoiy, madaniy) amalga oshirish – demokratiyaning yana bir muhim tamoyili bo‘lib, u faqat huquqiy davlatdagina to‘liq namoyon bo‘ladi. Shuningdek, fuqarolarning ijtimoiy va siyosiy faolligi hamda yuksak siyosiy madaniyatini ta’minlash ham demokratik tamoyillar ruhiga mos keladi demokratik tamoyillar siyosiy jarayonlarning rivojlangan shakl va usullaridan qonun doirasida, har xil tazyiq va zo‘ravonliklarga yo‘l qo‘ymagan holda foydalanish, mahalliy o‘z-o‘zini boshqaruv idoralarining jamiyatni demokratik rivojlantirish manfaatlari yo‘lidagi vakolatlarini kuchaytirishni nazarda tutadi. Demokratik tamoyillarning to‘liq ro‘yxati katta. Bunday darajaga yetish demokratik taraqqiyot yo‘lini tanlagan davlatlarning ideali hisoblanadi. Mustaqillik yillarida demokratiyaning asosiy tamoyillarini izchillik bilan hayotga tatbiq etib kelayotgan O‘zbekiston ham rivojlangan davlatlar qatoridan munosib o‘rin egallashga intilib, bu borada salmoqli yutuqlarni qo‘lga kiritmoqda.