Chiqindi yig‘uvchilar bir necha oy davomida tashlab yuborilgan kitoblarni to‘plab, Anqaraning Chankaya tumanida ajoyib kutubxona ochishdi. Ishchilarning bu g‘oyasidan xabar topgan turkiyaliklar esa ularga kitoblar sovg‘a qila boshladi. Dastlab kutubxona faqat sanitariya xodimlari va ularning oila a’zolari uchun mo‘ljallangan bo‘lsa, kitoblar sonining ortishi bilan bu maskan qiziquvchilar bilan to‘lib toshdi.

“Biz ishchilar tomonidan taklif qilingan kutubxona g‘oyasini muhokamaga qo‘ydik. Ko‘pchilik uni qo‘llab-quvvatlaganidan so‘ng loyiha amalga oshdi. Aslida, kimdir bu kitoblarni shunchaki tashlab ketayotgan bo‘lsa, kimdir ularni qidirayotgan edi”, deydi kutubxona ochilishida bosh-qosh bo‘lgan Chankaya hokimi Alper Tasdelen.

Hozirda kutubxonada 6 mingdan ortiq ilmiy va badiiy adabiyotlar mavjud. Shuningdek, bolalar burchagi hamda ilmiy tadqiqotlar bo‘limi ham tashkil etilgan. U yerda turk tilidan tashqari ingliz va fransuz tillaridagi kitoblarni ham topishingiz mumkin.

Kutubxona sanitariya xodimlariga tegishli bo‘sh turgan g‘isht zavodida joylashgan edi. Kutilmaganda mazkur loyiha faoliyati shunchalik kengayib ketdiki, bugungi kunda kitoblar chekka hududlardagi ta’lim muassasalariga, hattoki qamoqxonalarga ham yetkazib berilmoqda.