Giyohvandlik (narkomaniya) – inson ma’naviyatiga zid boʻlgan, uning ijtimoiy-ruhiy holatini butkul izdan chiqaradigan gʻoyat xatarli illat, bedavo xastalik. Unga chalingan kishilar borgan sari holdan toyadi, hissiyotlari qoʻpollashadi, ma’naviy qiyofasidan mahrum boʻladi, fe’l-atvorida axloq-odob me’yorlariga bepisandlik, xatti-harakatlarida tajovuzkorlik namoyon boʻladi. Odatda giyohvandlar asr vabosi – OITS xastaligiga yoʻliqib, hayotdan erta koʻz yumadi. Giyohvandlik – jinoyatchilikning oʻsishiga, yoshlarning buzilishiga, hatto millat genofondining aynishiga olib kelishi mumkin. Shuning uchun yoshlarni bu balo-qazodan asrab-avaylash, ularni san’at, adabiyot, sportga oshno qilib, barkamol insonlar etib tarbiyalash kunning eng dolzarb vazifalaridan biridir.