Genofond – genlar zaxirasi; turli gen (irq)larning tarqalishi, ularning nisbiy miqdor va tarkibiy sifati; muayyan organizmlarning tarqalganligi. Irsiy belgilarni oʻrganish va aniqlash inson genetikasi, jonivorlar hamda oʻsimliklar genetikasi uchun ham muhim ahamiyatga ega. Hozirgi vaqtda genofondni saqlash muammosi dunyoning koʻpgina mamlakatlari uchun dolzarb masalaga aylangan. Tabiatga qoʻpol va takabburlarcha munosabatda boʻlishga yoʻl qoʻyib boʻlmasligi, bunday munosabatni tabiat aslo kechirmasligi, ayniqsa, inson – tabiatning xoʻjayini, degan soxta sotsialistik mafkuraviy da’vo koʻplab odamlar, bir qancha xalqlar va millatlarning hayoti uchun fojiaga aylandi, ularni qirilib ketishi, genofondning yoʻq boʻlib ketishi yoqasiga keltirib qoʻydi. Shu nuqtai nazardan millat genofondini saqlash, har jihatdan barkamol, sogʻlom avlodni tarbiyalab voyaga yetkazish, odamlarning tabiat, atrof-muhitga munosabatini oʻzgartirish, sogʻlom turmush tarzini shakllantirish va targʻib etish muhim ahamiyat kasb etadi.