Gimnastika – jismonan va ma’nan barkamol insonlarni tarbiyalash vositasi, toʻgʻri qomatni shakllantirish, sogʻliqni mustahkamlash, irodaviy fazilatlarni tarbiyalash, harakatlarni mohirona, yengil ijro etishga oʻrgatish jarayoni. Gimnastika ta’lim-tarbiyaviy va sogʻlomlashtirish jarayonlarining ajralmas qismidir. Jismoniy mashqlarni bajarish – inson, ayniqsa, yoshlar salomatligini mustahkamlash masalalarini hal qilish shartlaridan biridir. Zero, kam harakatlilik organizmning koʻpgina funksiyalariga salbiy ta’sir etib, qator kasalliklarning paydo boʻlish va rivojlanish omili hisoblanadi. Shunday qilib, gimnastika keng ma’noda, insonlarning salomatligini mustahkamlash, mehnat faolligini oshirish, umrini uzaytirish, mehnat, turmush, dam olish sharoitlarini yaxshilash, bir soʻz bilan aytganda, sogʻlom turmush tarzini qaror toptirishga yoʻnaltirilgan tarbiya usulidir. Bu esa aholi salomatligini mustahkamlash, jismonan sogʻlom, ma’nan barkamol yosh avlodni tarbiyalash, fuqarolarni jismoniy tarbiya va sport bilan faol shugʻullanishga keng jalb etishga xizmat qiladi.