Gerontologiya – biologiya va tibbiyotning tirik mavjudotlar, shu jumladan, insonning qarishiga oid qonuniyatlarni oʻrganuvchi sohasi. Gerontologiyaning vazifasi qarishning ilk alomatlarini aniqlash, organizm hayot faoliyati jarayonida ularning bir-biri bilan aloqadorligini belgilash, tirik mavjudotning atrof-muhitga moslashuvining omili bilan bogʻliq jihatlarini tadqiq etishdan iborat. Gerontologiya qarilik jarayonining mohiyati, oʻziga xos xususiyatini oʻrganish uning irsiy, biologik, ijtimoiy, ma’naviy va axloqiy jihatlarini har tomonlama tahlil qilish imkonini yaratadi.

Gerontologik tadqiqotlar keksa va qari yoshdagi kishilarga xos boʻlgan kasalliklarning sabablarini aniqlash, oldini olishning samarali choralarini ishlab chiqishga yoʻnaltirilgan. Gerontologiyaning insonni oʻrganuvchi yoʻnalishi – ijtimoiy gerontologiya sohasida keksa yoshdagilar uchun tinch, osoyishta sharoit yaratish, hayotini mazmunli qilish ularning hayotiy tajribasidan yosh avlodni tarbiyalash jarayonida foydalanish, keksalarni jamiyat ishlariga keng jalb etish masalalari oʻrganiladi.