Vatanfurushlik – Vatanga xoinlik qilish, Vatanni sotishni anglatuvchi tushuncha. Bunday harakatlar qatoriga quyidagilarni kiritish mumkin: mamlakat manfaatlariga xiyonat qilish, oʻz shaxsiy manfaatlarini koʻzlab iqtisodiy, siyosiy va boshqa josuslik faoliyati bilan shugʻullanish, dushman tomoniga oʻtib oʻz xalqi, mamlakatiga qarshi kurash olib borish, qoʻporuvchilik ishlari bilan mashgʻul boʻlish va hokazo. Vatanfurushlikning mohiyati vatansizlik, Vatanidan begonalashish kabi hodisalar bilan solishtirilganda yanada yorqin namoyon boʻladi. Vatanfurushlik oʻz yurtining tinch va osoyishta hayotiga, uning ozodligi hamda obodligiga putur yetkazish, sha’ni va obroʻsini nafaqat mamlakatda, balki jahon miqyosida poymol qilish bilan barobardir. Vatanfurushlik davlat va jamiyatning barqaror taraqqiyotiga tahdid sifatida ham pinhona, ham oshkora tarzda namoyon boʻlishi mumkin. Vatanfurushlikning koʻpgina sabablari boʻlib, ulardan asosiysi boylikka, pulga ruju qoʻyib, Vatan manfaatlariga xiyonat qilishdir. Vatanfurushlik har qanday holatda ham ogʻir jinoyat hisoblanadi. Oʻzbekiston Respublikasining mudofaa salohiyati, davlat xavfsizligi yoki hududiy daxlsizligi, suverenitetiga zarar yetkazish, dushman tomonga oʻtish, josuslik qilish, davlat va harbiy sirlarni oshkor etish, mamlakatimizga qarshi dushmanlik faoliyatini olib borish – bularning barchasi vatanfurushlikning koʻrinishlaridir. Oʻzbekiston Respublikasi Jinoyat Kodeksida bunday jinoyatlar davlatga xoinlik sifatida ta’riflanadi.