Bo‘lib tashlab, hukmronlik qilish – g‘arazli geosiyosiy va geostrategik maqsadlarga erishishda qo‘llanadigan usul va tamoyillardan biri. Bu tamoyilni amalga oshirishning asosiy yo‘li biron-bir mintaqa yoki mamlakat ichida ijtimoiy parokandalikni keltirib chiqarishdir. Bunda, birinchidan, muayyan shaklda mavjud bo‘lgan ijtimoiy-iqtisodiy qiyinchiliklarni bo‘rttirib ko‘rsatish orqali aholining mavjud holatdan noroziligini uyg‘otish, ikkinchidan, o‘z nog‘orasiga o‘ynaydigan muxolifatchi kuchlarni yuzaga keltirish yo‘li bilan siyosiy beqarorlikni keltirib chiqarish, uchinchidan, “mamlakatda so‘z, matbuot, siyosiy erkinliklar yo‘q” qabilidagi tuhmatdan iborat mafkuraviy tazyiq o‘tkazish usullari qo‘llanadi.

O‘zbekiston misolida bunday holat ba’zi xorijiy OAVning mamlakatda amalga oshirilayotgan ijtimoiy, iqtisodiy, siyosiy, huquqiy, ma’naviy islohotlar haqida noto‘g‘ri axborot tarqatishi orqali jahon jamoatchiligida haqiqatga zid tasavvurni shakllantirish yo‘lidagi xatti-harakatlarida yaqqol ko‘rinadi. Muayyan mintaqaga nisbatan olib qaraganda, mazkur tamoyil ushbu hududda hukmronlik qilishga da’vo qilayotgan davlat borligini “asoslash”, ta’bir joiz bo‘lsa, shunday davlat timsolini yaratish yo‘lidagi urinishlarda namoyon bo‘ladi. Bunday g‘arazli intilishlar Yer yuzining turli nuqtalarida har xil ko‘rinishdagi nizolarni, davlatlararo munosabatlarda esa tanglikni yuzaga keltiradi. Natijada, mamlakatlarning moddiy-moliyaviy, ma’naviy-intellektual salohiyati jamiyat taraqqiyotiga xizmat qilish o‘rniga ana shu “obraz” ta’sirining oldini olishga yo‘naltiriladi. Shu tariqa asosiy maqsadga, ya’ni muayyan davlatni yakkalash, uni zaiflashtirib, o‘z “ittifoqchi”siga aylantirishga erishiladi. “Bo‘lib tashlab, hukmronlik qilish” tamoyilini amalga oshirishning yana bir yo‘li – xalqaro maydonda muayyan mamlakat haqida noto‘g‘ri, noxolis tasavvurlarni shakllantirishdir. Ayni paytda bu yo‘lda diniy omildan, ya’ni go‘yoki e’tiqod erkinligi buzilayotgani to‘g‘risidagi soxta ma’lumotlarni tarqatish usulidan foydalanishga urinishlar ham kuzatilmoqda. Bularning barchasi “maqsad vositani oqlaydi” degan aqida g‘arazli geostrategik g‘oyalar va manfaatlarni ro‘yobga chiqarishning asosiy qoidasiga aylanayotganini ko‘rsatadi.