Begʻamlik – beparvolik, loqaydlik maʼnosini anglatadi. Bunday kishilar turmushda yuzaga kelishi mumkin boʻlgan muammolarning yechimini izlashga intilmaydi, hamisha begʻam, betashvish yashashni koʻzlaydi. Ammo yuksak axloqli va odobli inson odamlarga va jamiyatga nisbatan beparvo boʻlishi, begʻam boʻlishi mumkin emas. Begʻamlik kayfiyati oxir-oqibat tevarak-atrofdagilarga, jamiyatga moddiy va maʼnaviy zarar keltirishi, mavjud muammolarning yanada keskinlashuviga olib kelishi mumkin.

Beparvolik (befarqlik, eʼtiborsizlik, loqaydlik) – kishidagi oʻzgalar hayotiga, atrof-voqelikka eʼtiborsizlik, loqaydlikni anglatuvchi tushuncha. Ayniqsa, davlat va jamiyat hayotida jiddiy oʻzgarishlar sodir boʻlayotgan, Vatan taqdiri hal boʻlayotgan pallalarda kishilardan yuksak faollik, masʼuliyat talab qilingan sharoitdagi befarqlik nafaqat illat, balki jinoyat hamdir. Bugungi kunda ham Oʻzbekiston kelajagini gʻayrat-shijoatlari, irodasi baquvvat, iymon-eʼtiqodi but, Vatan taqdiriga befarq boʻlmagan insonlarsiz tasavvur etib boʻlmaydi. Birovning hayotiga, yon-atrofda sodir boʻlayotgan voqea-hodisalarga betaraf va beparvo qarab, shunchaki kuzatuvchi boʻlib yashaydigan odamdan qoʻrqish kerak. Ulardan hech qachon yaxshilik chiqmaydi. Chunki ularda na iymon, na iroda boʻladi. Ular hatto oʻz xalqi va Vatani taqdiriga ham bamisoli begona odamdek qaraydi.

Azaldan maʼlumki, beparvo odam dushmandan ham xavfliroqdir. Chunki dushmanning kimligi, asl qiyofasi siz uchun oldindan maʼ lum boʻladi. Biroq loqayd va beparvo odamning qiyofasini birdaniga bilib boʻlmaydi. Shuning uchun u ichingizda yurib, sizga qarshi tish qayraydigan dushmanlar uchun imkoniyat yaratib beradi. Mashhur faylasuflardan biri ana shu hayotiy haqiqatni chuqur tahlil etib, quyidagi haqqoniy fikrlarni bayon qilgan: “Dushmanlardan qoʻrqma – nari borsa, ular seni oʻldirishi mumkin. Doʻstlardan qoʻrqma – nari borsa, ular senga xiyonat qilishi mumkin. Befarq odamlardan qoʻrq – ular seni oʻldirmaydi ham, sotmaydi ham, faqat ularning jim va beparvo qarab turishi tufayli Yer yuzida xiyonat va qotilliklar sodir boʻlaveradi”. Demak, beparvolik – irodasi zaif, qatʼiyatsiz odamlarga xos boʻlib, insonni maʼnaviyatdan, umuman insonlik martabasidan mahrum etadigan illatdir.