Barkamollik – kamolot, balogʻatga erishgan, bekamu koʻst, yetuk, mukammal, komil, maʼrifatli kishilarga nisbatan qoʻllanadigan tushuncha. U insonning aqliy, maʼnaviy, axloqiy jihatdan yetukligi, oʻzi tanlagan kasb-hunarning ustasi boʻlishi, shaxs sifatida shakllanib, Vatan taraqqiyoti, el-yurt farovonligi uchun jon kuydirishi, ezgu gʻoya va niyatlar bilan bunyodkorlik va yaratuvchanlik qobiliyatiga ega boʻlishini ham anglatadi. Barkamol inson boshqalarga oʻrnak boʻladi, ularni oʻz ortidan ergashtiradi. Bunday insonlar qancha koʻp boʻlsa, jamiyat shuncha barkamol boʻladi, ilm-fan, madaniyat rivoj topadi. Barkamollik vatanparvarlik, jasorat, himmat, qatʼiyat, iroda mustahkamligi kabi fazilatlarni oʻzida mujassamlashtirgan tushunchadir.