Asos (substansiya) – mantiqiy tafakkurning muhim shakli hisoblangan xulosa chiqarishning tarkibiy qismlaridan biri. Narsa va hodisaning Asosi sababiyat qonuni orqali namoyon boʻladi. Tabiat va jamiyat hodisalarini oʻrganish, bilish, tadqiq etish koʻp jihatdan asos va asoslash jarayoniga bogʻliq. Asoslar ilmiy tadqiqotning tabiiy mahsuli boʻlib, u odatda ixtirolar, kashfiyotlar tufayli qaror topadi. Moddiy olamdagi asoslar oʻzgarib turish xarakteriga ega boʻladi. Bu masalaning bir tomoni boʻlib, ikkinchi tomoni moddiy asoslarning mantiqan yakunlangan shaklda namoyon boʻlishi bilan bogʻliq. Umuman ilmda, turmushda, har qanday munozara va muhokamada, biror fikrni isbotlash yoki aniq xulosaga kelish uchun foydalaniladigan fikr asos deb yuritiladi.