Adabiy til – har qaysi xalq va millat maʼnaviyatida ulkan ahamiyat kasb etadigan, uning ruhiy olamini moddiy shaklda yuzaga chiqarish va umumbashariy taraqqiyot uchun xizmat qildirish, el-yurtni birlashtirish, oʻzlikni anglashda muhim vosita boʻladigan buyuk ijtimoiy hodisa.

Adabiy til umumxalq tilining sayqallangan, leksik, fonetik va grammatik jihatdan shu xalq shevalaridagi eng yaxshi xususiyatlarni oʻzida mujassam etib, sayqallangan, hamma uchun tushunarli va maʼqul meʼyorga solingan umummiliy muloqot vositasidir. Tarix va taraqqiyot jarayonida Adabiy til oʻzgarib, takomillashib boradi. Masalan, Alisher Navoiy davridagi oʻzbek adabiy tili hozirgi zamon oʻzbek adabiy tilidan farq qiladi. Istiqlol davrida adabiy tilning maʼnaviy hayotimizdagi oʻrni va ahamiyati tobora ortib bormoqda. Ayniqsa, 1989-yilda oʻzbek tiliga davlat tili maqomining berilishi adabiy tilimiz rivojida mutlaqo yangi sahifa boʻldi. Hozirgi davrda oʻzbek adabiy tili milliy maʼnaviyatimizning haqiqiy koʻzgusiga aylanib bormoqda.