Qonuniylik – jamiyatdagi barcha fuqarolar, tashkilotlar tomonidan qonun hujjatlariga toʻla rioya qilinishi.

Qonuniylikning mamlakat hududida bir xilda tushunilishi va qoʻllanilishi; Konstitutsiya va qonunlarning ustunligi – barcha normativ va individual huquqiy hujjatlar Konstitutsiya va qonunlar asosida qabul qilinishi va ularga zid kelmasligi; inson va fuqarolar huquq va erkinliklarining, burchlarining kafolatlanganini ifodalaydi. Qonuniylikning madaniyat bilan bogʻliqligi jamiyat aʼzolarining yuqori darajada madaniyatli, jumladan huquqiy madaniyatli boʻlganlaridagina qonuniylikga erishish mumkinligida namoyon boʻladi.

Qonuniylik maqsadga muvofiqlikni, qonun va qonun osti hujjatlari davlat hamda jamiyat manfaatlariga mos kelishini anglatadi. Ijtimoiy-iqtisodiy rivojlanish, turli xil shakldagi mulkchilik, jamiyatdagi iqtisodiy erkinliklar; siyosiy hurfikrlilik, koʻppartiyaviylik, davlat tuzumining demokratik tamoyillari qonun va qonunosti hujjatlarini tatbiq etish va nazoratini uyushtirishning samarali mexanizmi qonununiylik bilan taʼminlanadi. Qonununiylik shaxsiy va ijtimoiy hayotda doimo rioya qilish shaxs maʼnaviyatining yuksakligidan darak beradi. Shaxs va jamiyat hayoti oʻzaro uygʻun, bir butun hayot ekanini tushunadigan insonlar maʼnaviy jihatdan yetuk insonlar boʻlib, ular hayotda qonuniy talablarga asoslanib yashaydilar.