Mazoxizm – avstriyalik romanist Leopold fon Zaxer Mazox ismidan olingan bo‘lib, keng ma’noda, shaxsning o‘ziga nisbatan destruktiv, og‘riqli yoki haqoratli xatti-harakatlarga moyilligini bildiradi.

Mazoxizm – ma’naviyatsizlik shakllaridan biridir. Mazoxizmning turli ko‘rinishlari mavjud bo‘lib, jinsiy mazoxizm axloqsiz harakatdan lazzatlanishni bildiradi. Axloqiy mazoxizm esa xarakter ko‘rinishida bo‘ladi. Psixik mazoxizm tushunchasi esa shaxsning o‘ziga nisbatan har qanday ko‘rinishdagi adovat va destruktiv impulsni nazarda tutadi hamda mazoxizmning eng ko‘p tarqalgan ko‘rinishi hisoblanadi. Ommaviy mazoxizm katta guruh yoki populyatsiyalarga xos ommaviy tarzda o‘z-o‘ziga ziyon yetkazish shaklidir. Z.Freyd mazoxizmni sadizm (o‘lim instinkti)dan kelib chiqqan aybdorlik hissi ta’siridagi o‘z “Men”iga qarshi qaratilgan ikkilamchi holat deb ta’riflaydi. Jinsiy mazoxizm sherigi qarshisida o‘zini quldek itoatkor va uning hukmronligi qarshisida o‘zini himoyasiz sezishdan qoniqishdir. Mazoxizm ko‘pincha o‘smirlik davrida shaxsning qarshilik ko‘rsatishga qurbi yetmagan vaqtdagi seksual yoki jismoniy zo‘ravonlikning oqibati sifatida talqin qilinadi. Ma’naviy jihatdan inson tafakkuriga o‘ta yomon ta’sir ko‘rsatuvchi salbiy fe’l-atvor sifatida qayd etiladi.