Anton CHEXOV

BIR QIZ KUNDALIGIDAN

13-oktyabr. Nihoyat, mening ko‘chamda bayram! Bo‘lishi mumkinmas, ko‘zlarimga hech ishonolmayman. Derazam oldida ko‘rkam, sarbaland, qora soch, qorako‘z bir yigit bo‘zchining mokisidek u yerdan-bu yerga qatnaydi. Mo‘ylovi ham o‘ziga xo‘b yarashgan. U, mana besh kundir-ki, uyimiz oldida o‘ralashadi, kecha-yu kunduz derazamizdan ko‘zini uzmaydi. O‘zimni go‘yo hech narsadan xabari yo‘qdek tutayapman.

15-oktyabr. Bugun tongdanoq sharros yomg‘ir quya boshladi, bechora esa ko‘chada ivigancha turibdi. Buning haqiga unga qosh qoqib havoyi bo‘sa yubordim. Shunaqa go‘zal tabassum qildi-ki. U kim o‘zi? Singlim Varyaning aytishicha, yigit unga oshiq-u beqarormish, shu sabab uyimiz oldida mushukboladek shalobbo bo‘lib o‘tirganmish. Buncha laqqi bo‘lmasa-ya bu qiz! Hech zamonda qorasoch qorasochga ko‘ngil berarkanmi? Onam oxorli liboslarimizni kiygancha deraza oldida o‘tirishimizga buyurdi. “Ehtimol, bor-yo‘g‘i bir yaramas chiqar, balki martabali janobdir...” – dedi u. Yaramas... quel*… Siz nimani ham bilardingiz, oyijon!

16-oktyabr. Varya deydi-ki, uning hayotini boshiga yetganmishman. Yigit Varyani emas, meni sevgani aybimmi? Tasodifan yo‘lakka kichkina xatcha tushirib yubordim. O, makkor! Yengiga bo‘r bilan: “Keyin” – deb yozdi. Aylanib yurdi-yurdi-da, qarshimizdagi darvozaga qayta yozdi: “Qarshiligim yo‘q, faqat keyin...” Bo‘r bilan yozdi-yu, yozuvni darhol o‘chirdi. Nimadan yuragim buncha gupillaydi?

17-oktyabr. Varya tirsagi bilan ko‘ksimdan turtdi. Yaramas, ahmoq, hasadgo‘y! Bugun u bir gorodovoy**ning yo‘lini to‘sib, bizning derazamizga ishora qilgancha bir nimalar dedi. O‘yin o‘ynamoqchi. Avrayotgan bo‘lsa kerak. Eh, erkaklar! Zolim va yovuzsiz, ammo makkor va ajoyib ham!

18-oktyabr. Anchadan beri yo‘q bo‘lib ketgan akam Seryoja nihoyat bugun tunda uyga keldi. Yotog‘iga bosh qo‘yishga ham ulgurmagandi, pastga tushishini talab qilishdi.

19-oktyabr. Razil! Jirkanch! Ma’lum bo‘lishicha, anavi yigit o‘tgan o‘n ikki kun davomida allaqaysi kishining pullarini o‘marib juftakni rostlagan Seryojani iziga tushgan ekan.

Bugun darvozaga shunday yozdi: “Endi bo‘shman”. Mol! Unga tilimni ko‘rsatdim.

*Quel – qaydam, bo‘lishi mumkinmas, fransuzcha. 

**Gorodovoy – chor Rossiyasi davrida politsiyaning eng quyi xodimi.

Rus tilidan Rahmat BOBOJON tarjimasi.