Prezident Farmoni bilan shu yilning 1-oktyabrdan boshlab Oʻzbekistonda mehnatga haq toʻlashning eng kam miqdori 1 mln 155 ming soʻm etib belgilandi. Safarbarlik chaqiruv rezervi toʻlov badali esa mazkur qiymat bilan oʻlchanadi( Mehnatga haq toʻlashning 7 barobari).

Shu hisobda, 1-oktyabrdan keyin bir oylik harbiy xizmat uchun toʻlov miqdori amaldagi 7 mln 350 ming soʻmdan 8 mln 85 ming soʻmga oshiriladi.

Maʼlumot uchun, badal safarbarlik chaqiruv rezervi safiga olingan shaxslar xizmatga olingandan keyin, tomonlarning kelishuvi asosida, 1 yil mobaynida biryoʻla yoki bosqichma-bosqich (boʻlib toʻlash orqali) amalga oshirilishi mumkin.

Toʻlangan summa Mudofaa vazirligining “Safarbarlik chaqiruvi rezervi mablagʻlari” maxsus hisobraqamida jamlanadi.

Ushbu mablagʻlar muddatli harbiy xizmatchilarga nafaqa pulini toʻlash, vazirlikning moddiy-texnika bazasini mustahkamlash, safarbarlik chaqiruvi rezervi xizmatchilari taʼminotiga yoʻnaltiriladi.

Oldinroq yoʻl harakati qoidalarini buzganlik uchun ham jarimalar miqdori oshirilishi haqida xabar berilgan edi.