Oyina.uz portali oʻzbekning 100 ziyolisidan “HAR BIR INSON HAYOTI DAVOMIDA OʻQISHI SHART BOʻLGAN 10 KITOB” tavsiyasini berishda davom etadi.

Loyihaning 43-kuni yozuvchi Xurshid Doʻstmuhammad “Har bir inson hayoti davomida oʻqishi shart boʻlgan 10 kitob” tavsiya qiladi:

1.     Qurʼoni karim

2.     Alisher Navoiy asarlari lugʻati

3.     Abdulla Qodiriy, “Oʻtkan kunlar” romani

4.     Migel Servantes, “Don Kixot” romani

5.     Frans Kafka, “Jarayon” romani

6.     Shaxs, jamiyat, davlat mavzusidagi kitoblar

7.     Marshall Maklyuyen, “OAVni tushunish” kitobi

8.     Gabriel Garsia Markes, “Buzrukning kuzi” romani

9.     “Alpomish” dostoni

10.  Daniel Defo, “Robinzon Kruzo” romani.

Xurshid Doʻstmuhammad 1951-yili Toshkentda tugʻilgan. Toshkent davlat universitetining jurnalistika fakultetini tamomlagan. Dastlabki kitobi – “Hovli etagidagi uy” 1989-yili chop qilingan. Shundan keyin yozuvchining “Panoh”, “Oromkursi”, “Soʻroq”, “Sof oʻzbekcha qotillik”, “Mahzuna”, “Ibn Mugʻanniy”, “Yolgʻizim – Siz”, “Koʻz qorachigʻidagi uy”, “Jajman” asarlari, shuningdek, “Hijronim mingdir mening” qissa va hikoyalar toʻplami, “Bozor” romani nashr etilgan.

Xurshid Doʻstmuhammad, shuningdek, qatagʻon qurbonlaridan birining fojiali taqdiriga bagʻishlangan “Hamid Aʼlamovning aytolmagan gaplari” xotira-essesi va “Jurnalist boʻlmoqchimisiz?” risolasi, “Chayongul” kinossenariysi muallifi. Yozuvchi “Bozor” romani, “Hijronim mingdir mening” va “Ozod iztirob quvonchlari” kitoblari uchun 2000-yilgi “Ofarin” mukofotiga sazovor boʻlgan. Xurshid Doʻstmuhammad yapon adibi Akutagava Ryunoskening “Rasyomon darvozasi” hikoyasini, Temur Poʻlatovning “Yetti huzur-halovat va qirq qaygʻu-alam” romanini oʻzbek tiliga tarjima qilgan.

Yozuvchi “Oʻzbekistonda xizmat koʻrsatgan madaniyat xodimi” unvoni, “Doʻstlik” ordeni bilan taqdirlangan.

Oyina.uzni Telegramda kuzating