Азиза чақалоғи билан уйдан чиқолмай, уч ой деганда ойисиникига келди. Гўдак учун салқин уйга юмшоқ беланчак тортилди. Она яккаю ёлғиз қизини тансиқ таомлар билан меҳмон қилди. Аммо янги меҳмон ҳеч ором олмай йиғлайверди. Юриб-юриб олти йилда топилган набирасини оғритиб қўйишдан чўчиган буви машина чақиртириб, меҳмонларни илҳақлик билан уйига кузатди.

Тажрибасиз ёш она машинадан тушиб, йиғлаб толиққан боласини беланчакка  солди. Бола йиғидан тинди. Бир зумда ухлади-қолди.

Бироздан сўнг пишишини кутмай ташлаб кетилган паловхон  тўрани бувиси дастурхонга тугиб олиб келди. Ҳовли ичкарисидаги уй деразасидан пишиллаб ухлаётган неварасини кўриб, кўнгли тин олди.  

    Гулсанам КАРИМОВА,    

Фарғона вилояти Ёзёвон тумани 15-мактаб ўқитувчиси