2024 йилнинг 16 апрель куни Бирлашган Араб Амирликлари ўзининг 75 йиллик тарихидаги энг кучли ёғингарчиликни бошдан кечирди. Тошқин оқибатида Абу-Даби, Шаржа ва Рас-ал-Хайм кўчаларини сув босган, Дубай эса энг кўп жабр кўрган ҳудудга айланиб, у ерда тўқ сариқ рангдаги хавф даражаси эълон қилинган.

Биламизки, Араб амирликлари ўзининг иссиқ ва қуруқ иқлими билан бошқа мамлакатлардан фарқ қилади. Масалан, Дубайда йиллик ёғингарчилик миқдори 100 мм дан ошмайди. Шунинг учун маҳаллий ҳокимият анча йиллардан буён ёғингарчиликни сунъий жалб қилишга етарлича пул сарфлаб келган. «Булут экиш» номли бу жараёнда самолётдан туриб, булутларга ёмғир чақирувчи кимёвий моддалар пуркалади.

Тошқинларга сабаб бўлган суткалик ёмғир эса ўртача бир ярим йиллик ёмғир миқдорига тенг бўлган. Дунёнинг энг қуруқ ҳудудларида юз берган тошқин аҳоли орасида «сунъий чақирилган» деган қарашларни ҳам келтириб чиқарди. Лекин экспертлар бу фикрни рад этди.

Ёғингарчилик оқибатида, йўллар дарёга айланиб, кўплаб хонадонлар электр токисиз қолган, аҳолининг катта қисми бор бойлигини йўқотган. Ҳудуддаги барча нарса, жумладан, вилла ва қимматбаҳо автомобиллар ҳам сув остида қолди. Қайиқлар эса маҳаллий аҳолининг асосий ҳаракатланиш воситасига айланган.

Учиш ва қўниш йўлакларига йиғилган катта миқдордаги сув туфайли Дубайдаги энг йирик аэропорт ҳам маълум муддат чекланган тартибда фаолият юритган. Натижада, минглаб туристлар анчагача ўз юртига учиб кетолмаган.

Маҳаллий аҳолининг Deutsch Welle нашрига берган маълумотига кўра, мамлакат бундай ёғингарчиликка тайёр бўлмаган. Дренаж тизимининг яхши ишламаслиги эса ёмғир сувларининг тиқилиб, йиғилиб қолишига яна бир сабаб бўлган.

«Мен Дубайда туғилиб, катта бўлганман, лекин бунча миқдорда ёғингарчилик бўлганини ҳеч кўрмагандим. Билдимки, дренаж тизими бизда умуман ишламас экан, тизим бунча миқдордаги сувни қабул қилишга тайёр бўлмаган. Тинимсиз жала қуйилганда йиғилган сув тиқилиб қолаверган. Автомобилларимизни юқорироқ жойга қўйишга ҳаракат қилдик, бироқ бундан ҳеч қандай наф бўлмади, энди машиналаримиз кўчаларда сузиб юрибди. Менинг 3 машинам ва мототциклим йўқолди, уйдаги мебель ва биринчи қаватдаги электр жиҳозларим эса яроқсиз ҳолга келди», – дейди тошқиндан азият чеккан маҳаллий фуқаролардан бири.

Метеорологлар тошқинларнинг кўплаб мамлакатда юз бераётгани, Қозоғистондагисини ҳукумат «Аср тошқини»деб атагани ва Дубайдаги вазият ҳам табиий юзага келганини қайд этди. «Тошқинлар Эрон, Покистон, Яман ва бошқа ҳудудларда ҳам кузатилмоқда. Буларнинг барчаси дунё бўйлаб иқлим ўзгаришининг яққол белгиси саналади», – дейди мутахассислар.