Қашқадарёнинг Шаҳрисабз туманида шаҳар шовқин-суронидан йироқ, аммо қалбга яқин, хотираларга туташ Ғелон қишлоғи бор.

Қишлоқ аҳолиси 5200 кишидан ошади, аҳоли асосан деҳқончилик, чорвачилик ва боғдорчилик билан шуғулланади. Қишлоқ тоғ бағрида жойлашган, ҳавоси жуда тоза, табиати юракни энтиктирадиган даражада гўзал. Меҳнатда чиниққан аҳолининг ўртача умр кўриши 80-90 ёш бўлиб, қишлоқда 100 дан ошган дуогўй момо-боболар ҳам борки, уларнинг бардамлигини кўриб кексаликни тан олмаётган соғлом вужудларига ҳавас қиласиз. 

Тоғ баландлиги бўйича ётқизилган тош кўча бўйлаб кўтарилар экансиз, синч услубида қурилган уйларнинг томларидаги тандирларга, тандир ёнида нон ёпаётган келинларга кўзингиз тушади. Атрофни сув ва сут сепиб пиширилган ноннинг ҳиди қамраб олади. Тенгдошлари билан кўча чангитиб юрган болакайлар бобо-момоларига иссиқ нондан улашади, ўзи ҳам кулчани қўлтиқлаб велосипед, копток томон шошади... Бу шундайин гўзал, қалбга хотиржамлик берувчи манзара...

Орзуларга тўла кўзларда беғуборлик кўрасиз, ухлаб қолган фарзандини бағрига босиб, намозшом маҳал эшакда боғдан уйига қайтаётган аёлларни кўриб улар меҳнатига тасанно айтгингиз келади.

Қишлоқ менга бобомнинг бузилган уйини эслатди: дераза ромлари болалик соғинчидан қақраётгандек эди, гўё...

Ғелон аждодлар қадрияти, бутун миллат тарихи, она елкасида хотиржам кетаётган қизалоғу суратга олаётганингни сезиб қолган болакай кулгиси бўлиб қолди мен учун. Шаҳар замонавийлигидан анча узоқ, лекин қалбдаги хотираларга жуда яқин қишлоқ эди у.

Холида МУСУЛМОНОВА,

Oyina.uz