Absurd (lotincha absurdus – soxtalik, qalbakilik) – muayyan narsa, hodisa, fikr yoki xulosaning bema’ni, noto‘g‘ri va yasama ekanini ifodalaydigan tushuncha. Mantiqda xulosa va hukmlarning haqiqatga mos kelmasligini, san’at va adabiyotda esa soxta ruh hamda xususiyatlarni aks ettiradi. Fan va falsafada muayyan g‘oyalar, qarash hamda ta’limotlarning g‘ayriilmiyligi, hayotga mos kelmasligi, odamlarni haqiqatan yiroq maqsadlar tomon boshlashi bilan bog‘liq holatlarni ifodalash uchun qo‘llanadi. Absurdizm XX asr jahon adabiyotida hayotning ayrim tomonlari bema’ni va mantiqsiz ekanini tasvirlaydigan oqim sifatida shakllangan. Ingliz dramaturgi S.Bekket, fransuz adibi Alber Kamyu uning eng yirik vakilidir.