Diskriminatsiya (lotincha diskriminatio – farqlash) –

1) ma’naviy yoki siyosiy kamsitishni anglatadigan tushuncha;

2) biron-bir shaxs, millat yoki davlat huquqlarining boshqa davlat, millat yoki shaxs huquqlariga nisbatan cheklanishi.

Demokratik davlatlar qonunlarida hamda xalqaro huquqda diskriminatsiyaning barcha shakllari, jumladan, fuqarolar huquqlarini millati, irqi, jinsi, dini sababli amalda yoki yuridik jihatdan kamsitishga yo‘l qo‘yish taqiqlanadi. O‘zbekiston Konstitutsiyasi va davlatimiz qonunlarida barcha fuqarolarning teng huquqliligi kafolatlangan va mamlakatimizda diskriminatsiyaning hech qanday ko‘rinishiga yo‘l qo‘yilmaydi. Tarixda dunyoning turli mintaqalarida mavjud bo‘lgan diskriminatsiya hollariga ko‘plab misollar keltirish mumkin. Masalan, AQSHda qulchilik Amerikaning oltinchi Prezidenti Avraam Linkoln tomonidan bekor qilinganligiga qaramay, qora tanli fuqarolarning irqiga ko‘ra kamsitish hollari XX asrning 60-yillaridagina barham topgan. Diskriminatsiya o‘z mohiyatiga ko‘ra, inson qadr-qimmatining kamsitilishi, hayotiy rejalarining barbod qilinishi tufayli uning ma’naviyati yemiriladi, munosib hayot kechirishi xavf ostida qoladi. Shuning uchun ham 1948 yilda BMT tomonidan qabul qilingan Inson huquqlari Umumjahon deklaratsiyasida inson huquqlarini uning millati, dini, jinsi va irqiga ko‘ra kamsitish taqiqlangan. Bu hujjat insoniyat uchun ulkan g‘alaba bo‘ldi, zero, u tarixning ko‘plab davrlarida yuz bergan diskriminatsiyaning turli shakllarini to‘la-to‘kis bartaraf etish, inson zoti bu jirkanch ijtimoiy illat tufayli chekkan zahmatlariga chek qo‘yish ehtiyojlaridan kelib chiqqan edi.

O‘zbekiston ham jahon hamjamiyatining teng huquqli a’zosi sifatida ushbu hujjatni qabul qilgan. O‘zbekistonda irqi, jinsi millati, yoshi va ijtimoiy kelib chiqishidan qat’i nazar, barcha fuqarolarning teng huquqliligi qonun bilan qat’iy belgilab qo‘yilgani mamlakatimizda bunyod etilayotgan demokratik davlat va fuqarolik jamiyatining insonparvarlik tamoyillariga to‘liq mos kelishini ko‘rsatadi.