Dezinformatsiya – (fransuzcha des – salbiy va information – axborot) muayyan guruh va doiralarning g‘arazli maqsadlariga erishish yo‘lida soxta ma’lumotlardan foydalanish asosida ijtimoiy fikrni chalg‘itish maqsadida matbuot, radio, televideniye va internetda qo‘llanadigan usul, vosita. Masalan, Ikkinchi jahon urushi davrida tashviqotda keng qo‘llangan.

Dezinformatsiyaning tarixi, avvalo, OAVning paydo bo‘lishi va shakllanishi bilan uzviy bog‘liq, uning mazmun-mohiyati asosan siyosiy, g‘arazli maqsadlarni ko‘zlagan intilishlarda namoyon bo‘ladi. Biz bunday xatarlarga doimo sergak, ogoh va hushyor bo‘lib yashashimiz, ularga qarshi har tomonlama chuqur o‘ylangan, puxta ilmiy asosda tashkil etilgan, muntazam va uzluksiz ravishda olib boriladigan ma’naviy tarbiya bilan javob berishimiz zarur. Ana shundagina aholimiz, ayniqsa, yoshlarimiz voqelikka ochiq ko‘z bilan qarab, jahonda va yon-atrofimizda mavjud bo‘lgan, tobora kuchayib borayotgan ma’naviy tahdid va xatarlarni, tarqatilayotgan turli ma’lumot va axborotlarni to‘g‘ri baholab, ulardan tegishli xulosa va saboq chiqara oladi.