Bevaqt qoʻngʻiroq

Sapargulning telefoni jiringladi:

– Ha qizim?

– Oyi, meni olib keting. Men u bilan yashay olmayman.

Sapargul hayron. Bundan bir oy oldin qizi: “Men usiz yashay olmayman” degani uchun oʻsha yigitga uzatgan edi.

Muslima Mambetniyazova

Quvonch va qaygʻu

 U 18 yildan beri xotinining oʻlgan kunini tort va shampan vinosi bilan nishonlaydi. Qizi bu yil 18 ga toʻldi.

Shaxnoza Tursinbayeva

Adolat

– Ogʻa bu dunyoda adolat bormi?

– Albatta! Yaxshi ham, yomon ham bir kun kelib oʻladi. Shuning oʻzi adolat.

Islam Tilepov

Ishonch

– Yoʻq, yoʻq. U “alkash” emas. U keladi. Onam aldayapti. Kutaman...

Har oqshom shunday pichirlaydi qiz, onasi yirtib tashlagan otasining boshi yoʻq suratini quchoqlab.

Dinara Gʻayipbayeva

Abort

Xotini:

– Qiz ekan.

Eri:

– Kel, yana harakat qilib koʻramiz.

Mexribanu Mambetnazarova

Soʻnggi iltimos

Islom ogʻir-ogʻir nafas olarkan, Xudodan soʻradi:

– Allohim, soʻnggi marta onamni koʻrsam edi...  U shunday deya koʻzlarini yumdi. Va onasi uning qoʻllaridan tutib olib ketdi.

Baxtiyar Tursinbayev

Qoraqalpoq tilidan Nodirbek YOʻLDOSH oʻgirdi.