Dog‘istonning ulug‘ shoiri Rasul og‘a Hamzatov maktabda o‘qib yurgan kezlarida qo‘shni partada o‘tiradigan bir qizni yoqtirib qolibdi. Falakning gardishini ko‘ringki, balog‘atga yoshiga yetganda qiz boshqaga turmushga chiqib, Rasul og‘a boshqaga uylanib ketibdi.

Yillar o‘tibdi. Rasul Hamzatov nainki SSSR atalmish ulkan mamlakatga, butun jahonga ma’lum va mashhur shoir bo‘lib ketibdi. O‘sha qiz gap-gashtaklarda: «Rasul menga ishqiy she’rlar yozaverib-yozaverib shoir bo‘p ketdi, uni men shoir qilganman» deb maqtanib yurarkan.

Bu gap Rasul og‘aning ham qulog‘iga yetib boribdi. Bir tadbirda ittifaqo ikkalasi uchrishib qolishibdi. Hol-ahvol so‘rashgandan so‘ng, Rasul og‘a «Ering nima ish qiladi?» deb qiziqibdi.

«Falon bazada bosh buxgalter» deb javob beribdi ayol. Rasul og‘a ajablangan bo‘lib gap bilan uzib olibdi: «Iye, nega uni shoir qilmading?!»

Sharof Boshbekov