Yo‘lda ketayotsam bir yigit qo‘l ko‘tarib mashina to‘xtatyapti, oldida to‘xtadim, yigit mashina eshigini ochib:

–Assalomu alaykum, aka, shaharga ketyapman, lekin pulim yo‘q, telefon raqamingizni bersangiz pul tashlab qo‘yaman, – dedi.

–Vaalaykum assalom, behijolat, o‘tiring, yo‘lim shu tomonga. (Xayolimda yosh joniga bu yerda pulsiz nima qilyapti, degan o‘ylar).

Mashinaga o‘tirdi, qayerdanligini, nimaga bu yerda pulsiz yurgani haqida qisqacha so‘radim.

Ehhe, uni o‘n besh yosh desam, ichi to‘la gap ekan.

Mahmadona Laqmayev degan gapdon treningchi tashkil qilgan kurslarga qatnasharkan, 1 mln 50 ming so‘m to‘lov qilib, shunchalar qorni va miyasi gapga to‘ldirilganki to‘xtatib bo‘lmayapti. Maktab darsliklaridan o‘zimning esimda borlaridan savol berdim, javob yo‘q...

–Aka, kitob o‘qiysizmi?

–Evril Turonning "Oynur"ini o‘qiyapman!

–Sizga dunyodagi eng boy odam Palonchini “Boy bo‘lishning beshta siri” kitobini o‘qishni tavsiya qilaman.

–Xo‘p o‘qiyman, lekin menda hammasi yetarli. Kelajakda qaysi kasbni egallamoqchisiz?

– Prokuror bo‘laman.

–Trening uchun sarflangan pulni repititorlarga sarflab, yaxshi mutaxassis bo‘lishga harakat qilgan yaxshimasmi?!

–Endi aka... – bir dunyo gaplar. Hayron qoldim.

–Nega pulsiz, telefonsiz uzoq joyda yakka yuribsiz?

–Amaliyotdamiz, telefon va pullarni olib qolishgan, o‘zimizga ajratilgan joyga borib, uchragan har qanday begona odam bilan muzokara o‘tkazib, yana qaytib kursga yetib olish topshirilgan.

Ana bo‘lmasa...

Zamona shuni talab qilayotgandir, balki men tushunmasman bunday narsalarni, lekin aniq bilganim – bu yigit hozir o‘qishi, fanlarni mukammal o‘rganishi, bo‘sh vaqtida sport, biror hunar yoki uydagi bahorgi ishlarga yordam berishi kerak. Poydevorsiz uy qurayotgandek tuyuldi yigitning tanlagan yo‘li, taxminimcha bundaylar minglab topilsa ajabmas.

Otasi shu yigitlarga tomorqani chopishni buyursa ishonchim komilki, tap tortmay “Boy bo‘lishning beshta siri” kitobini o‘qiyotganini aytadi.

Xullas, o‘n daqiqa ichida biror fikri o‘zgararmikin deb ozgina urindim, befoyda. Menimcha yoshlarni, ayniqsa yuqoridagi yigitcha kabi o‘tish davridagi bolalarni ehtiyot qilishimiz kerak.

Sherzodbek UMARALIYEV