– Uka, “qarz daftari” bormi? 

– Bor, aka. 

– Shu daftaringizdagi muhtoj oilalarni qarzlarini hisoblab aytsangiz,  Ramazon oyida ularni qarzlaridan ozod qilib qo‘ysak degandik. 

Qassob yigitning yuzida achchiq tabassum paydo bo‘ldi. 

– Aka, keling, mana qo‘limdagi ro‘yxat, manavi akani ko‘pchilik taniydi,  taglarida “Malibu”,  o‘g‘illari falon joyda ishlaydi, qarzlarini bir yildan beri berolmaydilar. Manavi boyvachchaning uyini ko‘rsangiz naq saroy deysiz, bir yarim yil bo‘ldi, bez bo‘lib yuraveradilar. Qisqasi, ro‘yxatimdagilarning bari shunaqalar.

– Menga bular kerakmas, yetim bolalari bor va kambag‘al oilalarning ro‘yxatini bering, uka.

– Aka, siz aytgan oilalar zaruratdan 200-300 gramm go‘sht olishsa, bir haftaga qolmay pulini to‘lab chiqib ketishadi. Ularda amal va boylik bo‘lmasayam or-nomus bor. Qisqasi, mening daftarimdan siz izlagan odamingizni topa olmaysiz, salomat bo‘ling.

Indamadim.

Muhammad IKROM