Abu Rayhon Beruniy

***

Kichik narsaga e’tiborsiz qarama, uning foydali o‘rni bor, katta ishning kerakli joyi bor.

***

Xato sodir bo‘lmasligi uchun donishmandlar qayta-qayta kuzatishni va xalal yetish imkoniyatidan saqlanishni tavsiya qilganlar.

***

Yaxshi xulq yaxshilik alomatidir.

***

Asosi bo‘lmagan fandan voz kechsa ham bo‘ladi.

***

Shubhani aniq va noma’lumni ma’lumga qo‘shish biz yurgan yo‘lga loyiq emas.

***

Tenglik hukm surgan joyda sotqin, aldamchi ehtiroslar, g‘am-g‘ussa bo‘lmaydi.

***

Tarjimalarda, iboralarda ixtilof bo‘lmay chora yo‘q.

***

Bilim – qaytarish va takrorlash mevasidir.

***

Yolg‘on doim rostdan yengiladi, u xuddi suv yuzasidagi ko‘pikdek yo‘q bo‘lib ketadi.

***

Bilmaganligimiz sababli bilgan narsalarimizni aytmay qo‘yishimiz ham yaxshi emas.

***

Yunon faylasuflari avom xalqi uchun emas, balki yuqori tabaqalar uchun usul va qoidalar ishlab chiqqanlar.

***

Odam bo‘yining kichikligi sababli Yerning sharligi sezilmaydi, degan so‘z to‘g‘ri emas. Chunki odam bo‘yi baland tog‘ qadar bo‘lsa ham bir joyda turib, yer ustiga qarasa-yu, joydan joyga ko‘chib, yerdagi bor turli holatlarni bir-biriga solishtirib qaray olmasa, unday uzun bo‘y yerning sharligini bilishga ham, uning chegarasini aniqlashga ham foyda keltirolmaydi.

***

Har xil tartibsiz yoki yuqorida aytilgan so‘zlarga to‘g‘ri kelmaydiganlardan tabiat nafratlanadi va uni eshitish quloqqa malollik keltiradi

***

Har bir insonning qadr-qiymati o‘z ishini qoyil qilib bajarishida.

***

Ulug‘ hodisalar har vaqt yuz beravermaydi; agar bir davrda yuz bersa, undan keyingi kishilarga asrlar va uzoq zamonlar o‘tgach, tarixlar va bu tarixlarning bir-biriga ulanishi bilan yetib keladi.

“O‘ylar, hikmatlar, naqllar, she’rlar” kitobidan