To‘g‘risini aytsam, konsertlarga deyarli tushmayman. Lekin koreyalik qo‘shiqchi Xan Ji Xining konsertini yillar o‘tsa-da, unutib bo‘lmaydi. Qo‘shiqchi tarbiyali bo‘lsa, insoniylik xislatlari baland bo‘lsa, u  hurmat topaverar ekan.

So‘nggi kunlardagi voqealardan so‘ng bir koreys qo‘shiqchisining ikki yil avval bo‘lib o‘tgan konsertini yodga oldim. Uning insoniyligi o‘sha paytlarda katta zaldagi odamlar olqishiga sabab bo‘lgan, ko‘pchilik uzoq vaqt bu voqeani eslab yurgan, internetda ham shov-shuv darajasiga chiqqan edi. Men ham hozirgacha o‘sha koreys qo‘shiqchisini odamiyligi va kibrdan yiroqligi tufayli juda hurmat qilaman, har eslaganimda ta’sirlanaveraman…

O‘shanda internetda Janubiy Koreyaning Yonse universitetida og‘ir kasalliklarga chalingan insonlarga yordam ko‘rsatish maqsadida хayriya konserti uyushtirilganiga ko‘zim tushdi. Konsert Janubiy Koreyaning “Yangi hayot” fondi ko‘magida o‘tkazilgan edi. Tinglovchilar o‘zlari uchun sevimli va qadrli bo‘lgan 60–70-yillardagi rok-musiqalaridan bahramand bo‘ldi.

Taniqli qo‘shiqchi Xan Ji Xi ham davrani qizdirdi. Eng qiziqarli va hayajonli daqiqalar endi boshlangandi. U qo‘shiq kuylash bilan kifoyalanib qolmasdan, tomoshabinlarga yuzlanib antiqa taklif kiritdi. Har birlari 10 ming von (taxminan 8,5 dollar)dan yig‘ib bersa, sahnaning o‘zida 100 marta “otjimaniya” qilib bera olishini aytdi. Zaldagilar ko‘z ochib yumguncha pulni yig‘ib berishdi. Xan Ji Xi ham qiyinchilik bilan bo‘lsa-da, so‘zining ustidan chiqdi.

Bilasizmi, u deyarli oltmish yoshdan o‘tgan. Ammo uning o‘zini tutishi, sahna madaniyatiga xos yurish-turishi, tinglovchilarga nisbatan hurmati tahsinga sazovor. Bundan tashqari o‘sha paytdagi jasorati siz-u bizni ta’sirlantirmay qolmaydi. Chunki Xan Ji Xi yig‘ilgan pullarni yong‘in natijasida juda og‘ir ahvolda qolgan, bir necha operatsiyaga muhtoj o‘zbekistonlik bolakay – Baxtiyor Sindorovga xayriya qilishini aytdi. Mana shunday yaxshilik va bag‘rikenglik bardavom bo‘laversin...

Otabek YO‘LDOSHEV