Bugun ishxonaga yangi kelgan qiz, hamma bilan tanishib chiqdi. Ismi Xolida ekan.

Mohiraga navbat kelgan payt:

–Voy, opajon siz ko‘zimga judayam issiq ko‘rinyapsiz, sizni qayerda ko‘rganman-a? – deya hayrat bilan tikilib turardi.

Mohira biroz o‘ng‘aysizlandi:

–Ba’zida shunaqa bo‘ladi, biz uchrashmaganmiz avval, deb yuzini teskari burdi.

Chunki ko‘zlar ichki olamidan xabar berib qo‘yishidan juda qo‘rqib ketgan edi...

Yigirma besh yil oldin, arzimas sabab tufayli eriga achchiq qilib, olti oylik qizalog‘idan ham kechib ketgan Mohira taqdirdan bunday tuhfani xayoliga ham keltirmagandi. Qizining yuzidagi qop-qora yarashgan xoli uchun unga Xolida deb ismni o‘zi qo‘ygan edi...

Xayriniso ERGASHEVA