Raqs san’ati akademiyasi (Art dance academy) xoreografi Aiko Takeuchi o‘zbek, hind, arab va boshqa milliy raqslarni professional darajada o‘rgangan.

Aiko O‘zbekistonga ilk bor 2011-yili kelgan. O‘zbek milliy raqslariga qiziqib qolgach, bu sehrli olamga hech bir hadiksiz sho‘ng‘idi. Raqqosalarimizning har bir imo-ishorasini sinchkovlik bilan o‘rgandi.

O‘zbekcha salom berib, o‘ng qo‘lini ko‘ksiga qo‘yib turgan bu ayolni ko‘rganingizda Yaponiyadan kelgan Aiko Takeuchi ekaniga aslo ishongingiz kelmaydi. Uning har bir xatti-harakatida o‘zbek ayollariga xos muomala, nazokatni payqaysiz.

Aiko Takeuchi “Tanovor”ni haqiqiy farg‘onalik bo‘lib ijro etadi. “Lazgi”ga tushganda chin xorazmlikka aylanadi. “Yaqqu-yaq”ni esa xuddi Surxon qizlari kabi berilib o‘ynaydi. Uning bu muvaffaqiyatlarida mohir raqqosalar Gulmira va Dilorom Madrahimovalarning munosib hissasi bor.

Yaponiyada o‘tkaziladigan turizm festivallarida, “O‘zbek Navro‘zi Yaponiyada!”, “O‘zbekistonning mustaqillik kuni” kabi bayramlarda chiqish qilganida ko‘pchilik Aikoni hatto o‘zbek deb o‘ylagan. Andijon, Xorazm, Buxoro, Surxondaryo raqslaridan iborat “Popuri”ni ijro etganida maftunkor va yangicha raqsiga hamma qoyil qolgan.

2014-yili Yaponiyada “Buyuk ipak yo‘li” o‘zbek raqs ansamblini tuzdi. So‘ngra “Shirin” bolalar o‘zbek raqs ansambliga asos soldi. Hozir uning shogirdlari ijrosidagi raqslar guldastasi butun bir konsert repertuarini tashkil etadi.

Aiko Takeuchi haqidagi videorolikni Youtube kanalimizda tomosha qiling.

Charos TURSUNOVA

oyina.uz