Uning pechi yoqilgan issiq xizmat mashinasi svetaforda to‘xtadi.  Xayolchan mashina oynasidan tashqariga qararkan,  sovuqda xazonlarni to‘playotgan obodonlik tashkiloti xodimasining ko‘karib ketgan barmoqlariga ko‘zi tushib, qalqib ketdi.

Uning qalqishiga hamohang mashina ham joyidan qo‘zg‘aldi. Ishxonaga kirarkan, yo‘lakda oynalarni artayotgan farrosh ayolni ko‘rdi. Muzdek suv to‘la chelakka rangi uniqqan lattani xo‘llab olayotgan ayolning qo‘llari haligi xodimaniki bilan bir xil tusda edi.

U tez-tez yurib xonasiga yetib keldi. Kompyuter oldida klaviaturalarni qitirlatgancha muk tushib ishlayotgan hamkasblarini ko‘rmaganga olib tezda stoliga o‘tirdi.

Qo‘llariga qaradi,  oppoq, ajin tushgan bo‘lsa-da mayingina. Ko‘ngli joyiga tushdi shekilli,  mamnun jilmayib qo‘ydi, so‘ng kompyuterni yoqdi va sevimli serialini kechagi joyidan davom ettirib tomosha qila boshladi.

 Farzona FAYZ