Kayfiyat – inson ruhiy dunyosining ijobiy yoki salbiy emotsiyalar, his-tuyg‘ular ko‘rinishida yuzaga chiqadigan, nisbatan uzoq davom etadigan turg‘un psixik holatni ifoda etadigan tushuncha. Kayfiyat quyidagi o‘ziga xos xususiyatlarga ega: Birinchisi – zaif intensiv bo‘lib, u mamnun kayfiyatda ham, g‘amgin kayfiyatda ham aniq ko‘rinishga ega bo‘lmaydi. Bunday holatda kayfiyat intensiv asab xurujlariga sabab bo‘lmaydi. Ikkinchisi – uzoq muddatli, unda kayfiyat sekin rivojlanadi va uzoq vaqt davomida his qilinadi. Uchinchisi – noaniq – ma’lum kayfiyatni his qilgan kishi odatda shu kayfiyat sabablarini anglamaydi. To‘rtinchisi – o‘ziga xos difuz xarakter bo‘lib, unda kayfiyat odamning fikrlari, xatti-harakat va munosabatlariga ta’sir ko‘rsatadi. Kayfiyat situativ emotsiya va affektlardan ham farq qiladi. U ma’lum hodisalarning bevosita natijasi o‘laroq yuzaga chiqadigan emotsional reaksiya bo‘lmasdan, balki insonning o‘z oldiga qo‘ygan rejalari, qiziqish va kutgan ishlarining ahamiyatiga bo‘lgan emotsional reaksiyasidir. Kayfiyat, o‘z navbatida, sodir bo‘layotgan voqealarga ta’sir ko‘rsatadi. Bunda u odamdagi fikrlarning yo‘nalishini o‘zgartirib yuborishi mumkin. Kayfiyat keltirib chiqaruvchi sabablarning anglanish darajasiga bog‘liq holda muayyan noaniq emotsional fon ko‘rinishida yoki aniq farqlangan holat  ko‘rinishida yuzaga chiqadi.