Nosir RAHMAT

Umid

O‘zing o‘lsang ham, umiding o‘lmasin!

Hayot

Yashash – yiqilganingda boshqalar yordamisiz tura olish qobiliyatidir.

Freyd  va  nitshe

Freyd – Nitshening inqirozi.

So‘z

Dunyoni so‘z boshqaradi.

Adabiyot

Adabiyot – haqiqatdan bunyod bo‘lgan yolg‘on yoki yolg‘ondan kashf qilingan haqiqat.

Ijtimoiylik – insoniylik degani

Adabiyotshunoslik va san’atshunoslik ilmida “ijtimoiylik” istilohi o‘rniga “insoniylik” atamasidan foydalanmoq lozim. Zero, insoniylikdan yuksak ijtimoiylik yo‘q.

Shoir

Shoir – mening ikkinchi ismim...

Men  nima  uchun  yozaman?

Qalam ahli uchun “Men nima uchun yozaman?” hamda “Men nima uchun dunyoga kelganman?” savollarining javobi bitta.

Ikkinchi  umr

Mening bu foniy dunyoda qancha yashashim muhim emas, she’rlarimga uzoq umr tilayman. She’r – shoirning ikkinchi umri.

Iste’dodning  isyoni

Antonio Gaudi – ispaniyalik buyuk me’mor. U umrining 40 yilini ona shahri Barselona qurilishiga bag‘ishlagan. Ammo Barselonada birinchi tramvay yura boshlaganida aynan Antonioni bosib ketadi. Balki Antonio uchun tramvay sevimli Barselonasi yuziga xunuk xol bo‘lib tushgandir. Balki u qurilishi uchun umrini baxsh etgan imoratlariga tramvay ziyon yetkazishini xohlamagandir. Ehtimol, shu bois o‘zini tramvay ostiga tashlab, o‘limi bilan isyon qilmoqchi bo‘lgandir.

Yana  so‘z  haqida

Musavvir – rang, bastakor – ohang, haykaltarosh esa loy tilida gapiradi. Ammo bu hol so‘zning mavqeini zarracha pasaytirmaydi. Chunki inson qanday yashamoq kerakligini rang, loy yoki musiqa bilan emas, aynan Ilohiy So‘z vositasida bilib olgan.

Xayol

Xayol – ruhning xotirasi.

Oliy  ezgulik

Faqat yaxshilik qilganingizda abadiyatga to‘la ishonasiz. Zero, yaxshilik beiz ketmasligiga ishonish – eng oliy ezgulik sanaladi.

San’atning  qadri

Jamiyatda san’atning qadri ikki pul bo‘lsa, u najotni ko‘chadan qidiradi.

Sadoqat

Kimlar sizni tark etgani emas, siz bilan kim qolgani muhim.

Gunoh

Bola gunohsiz bo‘lgani uchun farishtani ko‘radi.

Shakl  va  mazmun

Inson tanasi – uning shakli, ruhi esa mazmunidir.

Ma’rifat

Abbat Faria – ma’rifat timsoli. Dantes mahbuslikdan Faria, ya’ni ma’rifat yordamida xalos bo‘ladi.

“Tarbiya”

Ko‘p kitob o‘qima, jinni bo‘lib qolasan.

Tirik  satrlar

Satrlar orasida shoirning yuragi urib, nafas olayotgani eshitilib turmog‘i kerak.

Shoir  jim  turmaydi

Ayrim rassomlar “tasviriy san’at – sukut saqlayotgan she’riyatdir” deydi. Nahotki, ular she’riyat sukut saqlayolmasligini bilmasa?!

Ta’sir

Ta’sir qalamchaga o‘xshaydi. Uni payvand qilsangiz, yangi meva hosil beradi.

Individ  va  shaxs

Individ – eng quyi betakrorlik. Olomon individlardan tashkil topadi. Shaxs esa eng yuksak betakrorlikdir.

Yaxshi  inson

Hayotda yaxshi inson bo‘lish qanchalik qiyin bo‘lsa, san’atda uning obrazini yaratish shunchalik mashaqqatlidir.

She’r  ishqi

Men she’rni ayol kabi sevaman va rashk qilaman.

Ilhom

Mening ilhom parisi degan tanishim yo‘q. Ammo odamlar qilgan yaxshilikdan ta’sirlanishim rost.

Til

Tilning o‘z tili bor.

Kosa  va  nimkosa

Biz ko‘p vaqtimizni badiiy asar emas, u haqida yozilgan kitoblarni o‘qishga sarf etamiz.

“Mona  liza”  va  onam

Leonardo da Vinchi onasi siymosiga badiiy ifoda topish uchun umrbo‘yi intilib yashagan. Uning bu yo‘lda erishgan eng yuksak muvaffaqiyati “Mona Liza” portreti sanaladi. Musavvir mazkur kartinada Mona Liza vositasida o‘z onasini tasvirlagan. Shuning uchun portretni egasiga bermay, bir umr o‘zi bilan birga olib yuradi. Rassom kartinada onaga bo‘lgan beqiyos muhabbatini shunchalik aks ettira olganki, har gal unga qarasam, Liza xonim yoki musavvirning onasini emas, o‘z onamni ko‘rgandek bo‘laman.

Bola

Bola – buyuk taqlidchi.

Beayb  so‘z

O‘z o‘rnida aytilmagan so‘zda ayb yo‘q.

Sanoatlashgan  “san’at”

Insoniyat mumtozlikdan naqadar uzoqlashib borayotganini hozirgi kino, teatr, musiqa, raqs va estrada misolida ko‘rish mumkin.

Iste’dod

Iste’dod mevali daraxtga o‘xshaydi, qarov bo‘lmasa, qurib qoladi.

Fikr  ortida

Heminguey “xabar yozishni bilgan ijodkor roman yozishni ham uddalaydi” deganida, balki xabar yozmoq uchun ham roman yozish iste’dodi va mas’uliyati kerak, demoqchi bo‘lgandir. Biz esa uning fikrini juda jo‘n tushunamiz.

Jamiyat  va  merso

Aslida begona kim? Mersomi yoki jamiyat? Zohiran Merso jamiyatga begona ko‘rinsa-da, aslida, yolg‘onga qaram jamiyat rostgo‘y insonga, ya’ni Mersoga begonadir.

Sevgi

Sevish uchun ham iste’dod kerak.

Taskin

Faqat ezgulik yo‘lidagi beminnat xizmat o‘laroq inson o‘ziga taskin bermoqqa haqli.

Maslak

Men qorong‘i qabrga yorug‘ yuz bilan kirsam deyman.

“Tafakkur” jurnali, 2019 yil 3-son.

“Ikkinchi umr”