MANQURT(LIK) — o‘zligini anglashdan mahrum bo‘lgan jamiyatning xususiyati; kundalik turmushda o‘z tarixini bilmaydigan, ongi past, insoniylikdan yiroq odamlarga nisbatan qo‘llanadigan tushuncha. Mustaqil fikrlashdan mahrum, itoatkor, jismoniy ehtiyojning quliga aylangan odamlar manqurt deb ataladi. Ma’lumki, ma’naviyatli shaxs jamiyat va millat ravnaqining bosh omili va poydevoridir. Shuning uchun ham muayyan millatni o‘zligidan mahrum etib, qaram qilmoqchi bo‘lgan fotihlar, avvalo, uni tilidan, tarixidan, ma’naviy qadriyatlaridan mahrum etishga uringan. Bosqinchilar millatga yot bo‘lgan an’analarni tiqishtirish orqali uning turmush tarzini, milliy o‘zligini o‘zgartirib yuborishni maqsad qilib qo‘ygan. Hozirgi davrning dolzarb muammolaridan biri o‘zligini yaxshi anglaydigan, ma’naviy barkamol avlodni, manqurtlikdan xoli bo‘lgan zamonaviy insonlarni tarbiyalashdir.