Hayotiy manfaatlar – har bir shaxs, jamoa, jamiyat va mamlakat hayoti uchun muhim ahamiyat kasb etuvchi manfaatlar majmuasini ifodalovchi tushuncha. Maʼnaviyat ham hayotiy manfaatlarning tarkibiy qismi hisoblanadi. Hayotiy manfaatlar inson tafakkurining bosqichma-bosqich rivojlanib borishini taʼminlash bilan birga, uning maʼnaviy shakllanishiga ham katta hissa qoʻshadi. Odatda hayotiy manfaatlarga munosabat orqali maʼnaviyat darajasini aniqlash, yoki aksincha, maʼnaviyatga qarab hayotiy manfaatlar nimalardan iborat ekanligini anglash mumkin. Hayotiy manfaatlarga munosabatda maʼnaviy tarbiyaning ahamiyati beqiyosdir. Chunki har bir shaxs maʼnaviy tarbiya mezonlari orqali oʻz hayotiy manfaatlarini belgilaydi. Shaxs tafakkuridan mustahkam joy olgan hayotiy manfaatlar uning umr mazmunini ham belgilab beradi. Shu jihatdan hayotiy manfaatlarni maʼnaviyatdan ayri holda tasavvur qilib boʻlmaydi.