Qiyomat (arabcha oʻliklarning tirilishi, tik turish, oʻrindan turish) – dunyoning tugashi va oxirat kunining boshlanishi haqidagi tushuncha. Qurʼonda oxirat kunining boshlanishi bilan bogʻliq dahshatli hodisalar, barcha mavjudotlarning halok boʻlishi va qayta tirilishi, birma-bir soʻroq qilinib, savob va gunohlari oʻlchanishi, jannat va doʻzaxga kiritilishi, doʻzax azoblari, jannat rohatlari batafsil bayon etilgan. Qiyomat toʻgʻrisida islom bagʻrida shakllangan alohida fan yoʻnalishlarining barchasida fikrlar bildirib borilishi, bu toʻgʻridagi maʼlumotlarning keng sharhlanishi va asrlar davomidagi targʻibotlar odamlarni yovuzlik, yomonlik, harom, dinsizlik, bidʼat, johillik va boshqa juda koʻp illatlardan tiyish maqsadiga xizmat qilishi bilan maʼnaviy hayotda katta ahamiyat kasb etgan. Odamlarda qiyomat kunidagi soʻroqdan qoʻrqish hissini shakllantirish vositasida maʼnaviy tubanlikdan tiyilish, turli-tuman ezgu ishlarga qoʻl urish orqali soʻroq kuni sharaflanganlar qatoridan oʻrin olishga intilish fikrini shakllantirgan. Qiyomat haqida Avesto, Tavrot, Injil, Zabur kabi boshqa dinlarning ilohiy kitoblarida ham qaydlar mavjud boʻlib, bu matnlarning mohiyati bir-birini toʻldirishi mumkin.