Qabohat – maʼnaviyat talablariga zid, yuksak maʼnaviylik tamoyillariga mos kelmaydigan qabih ish, yaramas xatti-harakat; qabihlik, razillik, ifloslikni anglatuvchi tushuncha. Qabohat, qabih soʻzi anglatgan maʼno pastkash, yaramas, faqat oʻz manfaatini koʻzlaydigan kishilarga nisbatan qoʻllanadi. Qabih kimsalar jamiyatga, atrofdagi kishilarga hech qachon yaxshilikni ravo koʻrmaydi. Koʻpincha Qabohat bunday kishilarning shaxsiy xususiyatiga aylanadi. Bu soʻz barcha xalqlarda salbiy maʼnoni anglatadi. Qabohat, va “razolat” tushunchalari mohiyatan bir-biriga yaqin maʼnoni anglatuvchi soʻzlar boʻlib, har ikkalasi ham kishidagi eng jirkanch, yomon illatlarni ifodalaydi. Qabohat domiga tushgan odam har qanday jirkanch ishlarga qoʻl uradi, hech kimni ayab oʻtirmaydi, binobarin, uning uchun muqaddas narsaning oʻzi boʻlmaydi.