Xushomadgoʻylik – laganbardorlikka xos xislat, xatti-harakatni ifodalovchi tushuncha. Xushomadgoʻylik kishilardagi salbiy illatlardan biri hisoblanadi. Xushomadgoʻylik zamirida, albatta, muayyan manfaat yotadi. Chunki amal, mol-mulk yoki biron narsaga egalik istagi, odatda, noqonuniy yoʻl bilan qondiriladigan boʻlsa, xushomadgoʻylikka zoʻr beriladi. Xushomadgoʻylik munosabati soxtalikni, yuzakilikni keltirib chiqaradi. Insonga insonning xushomad qilishi oʻsha insonni yoʻldan chiqarishga, buzishga olib keladi.

Xunuklik – estetika kategoriyasi, goʻzallikning aksi, inson goʻzalligi, shaʼni, qadr-qimmati, tabiatining saxiyligi va ideal tasavvurlarga xilof keladigan xususiyat, narsa-hodisalarni ifodalaydigan tushuncha. Xunuklikni idrok etish kishi qalbida turli xil salbiy his-tuygʻu, kayfiyat qoʻzgʻatadi. Xunuklik goʻzallikka qisman bir jihatdangina ters boʻlsa, u kishida baʼzan taassuf, gʻazab, turli xarakterdagi kulgi (quvnoq, achchiq, zaxarxanda) uygʻotadi; goʻzallikka batamom zid kelsa, jirkanchli, hatto dahshatli hodisaga aylanib, kishida shunga yarasha nafratli hissiy munosabatni hosil qiladi.