Fuzalo (arabcha donishmandlar, ziyolilar) – fazilat, bilim va maʼrifatda ustuvor boʻlgan yetuklik, kamolot egalariga nisbatan qoʻllanilgan tushuncha. Fozil va iqtidorli kishilar, Haq taolodan yetuvchi fayz sabab fazilat, lutfga yetishish. U Sharqda ikki qismga ajratilgan: biri – fayzi aqdas, yaʼni ilm-martaba orqali erishilsa, ikkinchisi fayzi muqaddas – unga haqiqat va oliy mohiyat tufayli erishiladi. Har ikki holatda ham fuzalolar oʻzlarida yuksak maʼnaviyat, maʼrifatni mujassam etgan shaxslar hisoblanib, ular davlat va jamiyat taraqqiyotiga, uning rivojlanishiga, farovonligiga katta taʼsir koʻrsatgan. Xususan, xalqni, millatni tanishda, dunyoga tanitishda, kishilar orasida mehr-muhabbat, ezgulik, odamiylikni shakllantirishda ularning maʼnaviyati, maʼrifati muhim ahamiyat kasb etadi.