Fidoyilik – boshqalar manfaati yoʻlida oʻz qonuniy manfaatlarini, hatto hayotini qurbon qilishga tayyor turgan, jamiyat uchun umumiy boʻlgan oliy maqsad va ideallarni deb oʻzidan kecha oladigan kishilar xatti-harakatlarini ifodalovchi maʼnaviy tushuncha. Fidoyilik tamoyilining mazmuni turli tarixiy davr va ijtimoiy jarayonlarda oʻziga xos tarzda namoyon boʻladi: u maʼlum bir davrlarda ommaviylashishi yoki kamayishi mumkin. Chunonchi, mustaqillikka erishganimizdan soʻng dastlabki paytlarda oʻtish davriga xos boʻlgan fidoyilikka nisbatan xudbinlik tamoyilining kuchaygani koʻzga tashlangan boʻlsa, hozirgi vaqtda esa, aksincha, jamiyatimizda fidoyilik tamoyili ustuvor ahamiyat kasb etmoqda, “Elim deb, yurtim deb yonib yashash kerak!” degan shior asosida yashayotgan kishilar doirasi tobora kengayib bormoqda. Ana shu maʼnaviy jarayon qanchalik tezlashsa, yangi qurilayotgan davlatning shakl-shamoyili shunchalik muayyanlik kasb etadi. Shu bilan birga, fidoyilik maʼnaviy qadriyatlardan biri boʻlib, Vatan manfaatlari yoʻlida fidoyilik namunalarini koʻrsatishga hozir boʻlgan shaxslarga xos fazilat. Vatanga, xalqiga boʻlgan hurmat, muhabbat, ishonch tuygʻusi muayyan umumiy manfaatlar, maqsadlar asosida shakllanib, kishilar qalbidan chuqur oʻrin oladi hamda faoliyatiga taʼsir qilib, ularni masʼuliyatli vazifalarni bajarishga safarbar etadi. Fidoyilik oʻz taqdirini Vatan, millat taqdiri bilan bogʻlagan barcha kishilarga xos fazilatdir. Fidoyilik soʻzda emas, balki amaliy ishlarda namoyon boʻlgandagina taraqqiyotning hal qiluvchi omiliga aylanishi mumkin. Murakkab sharoitlarda mustaqilligimizning iqtisodiy, siyosiy, ijtimoiy, maʼnaviy asoslari mustahkamlanayotgan hozirgi kunda vatanparvarlik eʼtiqodi amaliy ishlarda fuqarolarning kundalik faoliyatida namoyon boʻlishi katta ahamiyatga ega.