Farishta (forscha malak, hur, gʻilmon) – nurdan yaratilgan, nafs va xohishga ega boʻlmagan, Alloh amrini bajaruvchi, koʻzga koʻrinmaydigan maxluqot. Mazkur atama baʼzan insonga nisbatan qoʻllanib, odamning turli gunohlar, yovuz niyatlar, axloqsizlik, buzgʻunchilik va boshqa illatlardan pokligini, maʼnaviy yuksakligi, bezarar va aksincha, hammaga foydasi tegishi, donishmandligi, hayot da yuz beradigan voqea-hodisalarning mazmun-mohiyatini koʻrgan-kechirgan tajribalari vositasida tushuntirib bera olishi, eʼtiqodliligini ifodalaydi. Shunga koʻra, baʼzan yaxshi bir inson haqida gap ketganda, “Farishta odam”, “Farishtasifat odam” kabi sifatlashlardan foydalaniladi. Aksincha, salbiy xususiyati sezilib turadigan shaxs, joyga nisbatan “Farishtasiz” iborasidan foydalaniladi: “Farishtasiz odam”, “Farishtasiz uy” va hokazo.