Italiyalik fermer va rassom Dario Gambarin san’at asarlarini yaratishda, odatda, faqat traktordan foydalanadi va yerni shudgor qilib qahramonlarini yaratadi. U asosan dunyo yetakchilarining ulkan portretlarini, global muammolarga ramziy munosabatini tasvirlab keladi.

Gambarinning navbatdagi san’at asari – Dostoyevskiyning 200 yilligiga bag‘ishlangan eni ikki yuz ellik metrli surat bo‘ldi. Noan’anaviy portret 25 ming kvadrat metrni tashkil qiladi. Unda yozuvchining rus tilidagi familiyasi va ingliz tilidagi “Go‘zallik bizni qutqaradi” iborasi ham aks etgan. Rassomning ta’kidlashicha, yozuvda “Telba” romaniga ishora bor, portretdagi ko‘zlar esa quyosh nuri tufayli ko‘k bo‘lib tovlanadi. Bundan oldinroq u Italiya terma jamoasi g‘alabasiga bag‘ishlab surat ishlagan edi.

Gambarinning kolleksiyasida dunyo yetakchilaridan, Vladimir Putin, Donald Tramp, Barak Obama, Kim Chen In, Jon Kennedi va Nelson Mandela kabi obrazlar va koronavirus tarqalishiga bag‘ishlangan surat ham bor. Shuningdek, Rim papasi Frensis, Leonardo da Vinchi, Betxoven portretlarini ham yaratgan.

Traktorda chizilgan asarlarning umri, afsuski, qisqa. Ular bir necha haftagacha saqlanib turadi xolos. Shunga qaramay, qanchalik uzoq vaqt va jismoniy mehnat talab qilmasin, Gambarin o‘z qiziqishlaridan bugungi kungacha voz kechgani yo‘q.

Rassom-fermerning o‘ziga xos yo‘nalishi hozirda “land-art” atamasi bilan nomlangan. Yer san’ati – landshaftda yaratilgan, tuproq bilan ishlanadigan san’at turi hisoblanadi.