Tanqid – biror narsaga baho berish maqsadida uni tahlil qilish, muhokama etish, u haqida salbiy fikr bildirish, kamchiliklarini atroflicha asoslash va hal etish maqsadida bildiriladigan fikr-mulohazalar majmui. Tanqid asosli boʻlsa, uni eʼtiborga olish mavjud kamchiliklarning oldini olishga, taraqqiyotga ijobiy taʼsir etishga olib keladi. Tanqidga shu bois taraqqiyot omili sifatida qaraladi. Manfaatlar uygʻunligi asosida amalga oshirilgan tanqidiy mulohazalar keskinlik va adovatni keltirib chiqarmaydi. Tanqid ayrim hollarda arzimas kamchiliklarni boʻrttirib koʻrsatish, erkin fikr bildirish imkonini suiisteʼmol qilish evaziga mavjud muhitda keskinlikni yuzaga keltirishi ham mumkin. Tanqid ayrim shaxs, guruh, jamoaga, aniqrogʻi, ular faoliyatining natijalariga qaratilgan boʻlishi mumkin. Bunda shaxsiy manfaatlar bilan milliy manfaatlar uygʻunligi taʼminlanganligi Tanqidiy fikrlarni umummanfaat nuqtai nazaridan toʻlaqonli tahlil qilishga imkon yaratadi.